Бүгүн Тон райондук сотунда медиатордун катышуусунда жумушчу жолугушуу өткөрүлдү.

Жолугушуу Тон райондук сотунун төрайымы Аида Талантбекова, судья Самарбек Сарыбаев жана медиатор Усенкадыр кызы Аселдин катышуусунда өттү.

Иш-чаранын жүрүшүндө сотто медиацияны колдонуу маселелери, анын ичинде талаш маселелерди сотко чейинки этапта жөнгө салуунун жолдору талкууланды. Катышуучулар медиация институтунун ролун, анын артыкчылыктарын жана практикалык колдонуу мүмкүнчүлүктөрүн кеңири карап чыгышты.

Жолугушуунун негизги максаты – тараптар ортосундагы пикир келишпестиктерди соттук териштирүүгө жеткирбестен, тынчтык жана өз ара макулдашуу жолу менен чечүүнүн натыйжалуу механизмдерин өркүндөтүү болуп саналат. Бул багытта медиатордун ролу өзгөчө белгиленип, сүйлөшүүлөрдү туура нукка буруу жана конструктивдүү диалог түзүүдөгү мааниси баса көрсөтүлдү.

Медиатор Усенкадыр кызы Асел өз сөзүндө медиация процессин уюштуруунун өзгөчөлүктөрүнө токтолуп, тараптарды диалогго тартуунун жана орток чечим табууга багыттоонун ыкмалары тууралуу маалымат берди. Ошондой эле компромисске келүүнүн артыкчылыктары жана өз ара ишенимди бекемдөөнүн мааниси белгиленди.

Жолугушуунун алкагында сотто медиацияны активдүү колдонуу, аны өнүктүрүү жана калк арасында түшүндүрүү иштерин күчөтүү боюнча сунуштар айтылды. Мындан тышкары, медиацияны колдонуу аркылуу талаш маселелерди ыкчам жана натыйжалуу чечүүгө жетишүү мүмкүнчүлүктөрү айтылды.

Сот өкүлдөрү тынчтык жолу менен жөнгө салуу тараптар үчүн убакытты жана каражатты үнөмдөөгө, ошондой эле өз ара мамилелерди сактоого өбөлгө түзөрүн белгилешти. Мындай ыкма коомдогу укуктук маданиятты жогорулатууга жана социалдык чыңалууну азайтууга көмөк көрсөтөт.

Жыйынтыгында, жолугушуу медиация институтун өнүктүрүү жана аны сот ишмердүүлүгүндө натыйжалуу колдонуу багытында маанилүү кадам катары бааланды.