Президенттин 2024-жылдын 18-декабрындагы «Улуттук дем — дүйнөлүк бийиктик» уңгужолу жөнүндөгү Жарлыгын ишке ашыруунун алкагында, ошондой эле Кыргыз Республикасынын Жогорку сотунун төрагасы тарабынан бекитилген иш-пландын негизинде өлкөнүн жергиликтүү сотторунда улуттук баалуулуктарды, тарыхый мурастарды жана адилеттүүлүк принциптерин даңазалаган иш-чара өткөрүлдү.
Ушул максатта Ысык-Көл райондук соту тарабынан «Көчмөн намысы: адилеттүүлүктүн жана нарктын башаттары» аталышындагы иш-чара уюштурулду.
Иш-чара Чолпон-Ата шаарындагы ат майданында жайгашкан Ысык-Көл мамлекеттик тарыхый-маданий корук-музейинин филиалында өткөрүлүп, ага Ысык-Көл райондук сотунун төрайымы, судьялары жана сот аппаратынын кызматкерлери катышышты.
Иш-чаранын жүрүшүндө катышуучулар көчмөн цивилизациясынын тарыхы, кыргыз элинин кылымдардан бери калыптанган адеп-ахлактык баалуулуктары, адилеттүүлүккө негизделген коомдук мамилелер жана улуттук нарктар тууралуу маалымат алышты. Ошондой эле маданий мурастар менен таанышып, улуттук аң-сезимди бекемдөө жана тарыхый мурастарды сактоонун мааниси белгиленди.
Мындай иш-чаралар кызматкерлердин мекенчилдик сезимин арттырууга, улуттук баалуулуктарды урматтоого жана «Улуттук дем — дүйнөлүк бийиктик» уңгужолунун негизги максаттарын жүзөгө ашырууга өбөлгө түзөт.
